كل اللى احنا عاوزينه شوية رز على حسب الكمية وشوية شعرية برضه على حسب الكمية وحتتين سمنة او زبدة ونقطتين زيت نباتى دوار الشمس او درة كله زى بعضه
اول حاجة هاتنقى الرز كويس اوى
وبعدين هاتغسليه فى مصفاه خرمها ديقة وحاسبى ليتقلب منك فى الحوض
وبعدين هاتنقليه لطبق غويط وتسيبيه منقوع فى مايه لمده نص ساعة
بس متسيبيهوش كتير علشان ميعجنش
بعد ما النص ساعة خلصت هتصفى الرز حلو اوى فى مصفاه خرمها ضيقة
وهاتيجى فى حلة تحطى شوية سمنة او زبدة ونقطتين زيت
والاتنين مهمين
لو حطيتى زبدة بس هيبقى طعم الرز مغير وغريب
ولو حطيتى زيت بس هيبقى طعمه مش لذيذ
وتشغلى النار هادية ولما الزبدة تسيح هتحطى الشعرية
وتقلبيها فى الزبدة
طبعا انا طامسة ايدى لان كان فيها مونوكير وبلاوى
واوعى تسرحى وتسيبيها علشان متتحرقش
وبعد مالونها يغمق مش تتحرق
يعنى اللون ده مناسب اوى
هاتنزلى بالرز
وتقلبيه فيه
بعها علطول هاتجيبى كوباية ماية من الحنفية
اوعى تكون ساقعة
وتنزلى على الرز بالشعرية
كل ده طبعا النار شغالة
وخلى بالك لما الماية هاتنزل هاتطش
متتخضيش خااااااااالص
ده صوت ودخان بس لكن مش هيأذيكى
واقعدى ضيفى ماية لغايت لما تكون مغطية الرز بمقدار عقلة صباعك السبابة
حطى صباعك فى الماية متخافيش مش هاتلحق تكون سخنت
ورشى ملح
اوعى تنسى ترشى الملح
اوعى تنسى ترشى الملح
الا هل بلغت
دلوقتى هاتغطى الحلة وتوطى النار
واوعى تفتحى عليها قبل تلت ساعة كده
بس اوعى تكونى مشغلة الشفاط والا الرز هايتحرق وتنشف ميته
بعد تلت ساعة هاتفتحى عليه وتقلبيه
ولو كان نشف خالص ولزق فى الحلة ضيفى كوباية ماية صغيرة اوى
لو منشفش وملزقش متضيفيش
بعد كده تغطى عليه
كمان ربع ساعة هاتقلبيه تانى
وتحطى تحتيه الصاجةاو الشياطة
دى حاجة بتشتريهامن محل الادوات المنزليه علشان الرز ميتحرقش
دلوقتى لو عايزة تعلى النار شوية مفيش مشكلة
وتسيبيه لغايت لما يستوى
هاتعرفى ازاى انه استوى.؟؟
هاتدوقيه
وبعد كده طفى عليه
واغرفى
وبالهنا والشفا
منقوووووووووووووووووووول
ليست هناك تعليقات:
إرسال تعليق